Inona ny euthanasie ?

Avy amin’ny teny grika hoe eu (tsara) sy thanatos (fahafatesana) ny teny frantsay hoe euthanasie, midika hoe fahafatesana tsara. Manondro ny fomba medikaly entina manafohy ny andron’ilay marary mijaly mafy tsy ahitana tsirim-panantenam-pahasitranana ny euthanasie amin’ny ankapobeny.
Fanomezan’Andriamanitra ny aina ho an’ny Kristianina. Andriamanitra irery no tompon’ny aina. Misy heviny lalina koa ny fijalian’ireo marary sahala amin’ny fijalian’i Kristy. Tsy midika velively anefa izany fa tsy ankasitrahan’Andriamanitra ny fanamaivanana ny fanaintainana atao amin’ny marary. Nanamaivana sy nanasitrana ny fijalian’ireo marary sy mijaly i Jesoa. Tsy maintsy tadiavina noho izany ny hanamaivanana ny fanaintainan’ireo maty sy mijaly. Miorina amin’ireo foto-kevi-dehibe ireo ny lovan-tsofina sy ny fampianaran’ny fiangonana rehatra momba ny euthanasie.

Voalohany, mety tsy mahasoa ny marary mafy an-dàlam-pahafatesana avokoa akory ny fitsaboana medikaly rehetra izay manalava ny ainy. Takian’ny làlan’ny moraly ara-pitsaboana isika mba handray ny fomba mahazatra fa tsy fomba miompampana amin’ny fitandrovana ny aina tsy ho faty. Jerena amin’izany ny mety fahafahampahasitranan’ilay marary, ny fandaniana ara-bola sy ny herim-po tafiditra amin’ny fikarakaran’ny manodidina ny marary ary ny fahavononan’ilay marary ho faty.
Faharoa, miavaka tsara amin’ny lalàn’ny moraly ara-pitsaboana ny famonoana mivantana sy ny famelana ho faty. Fanomezan’ Andriamanitra ny aina ho an’ny Kristianina.Meloka ara-moraly izay mamono mivantana an’ireo izay tsy manan-tsiny.
Ireto no mety azo amintinana azy:

- Azo atao ny manapa-kevitra tsy hampiasa fitaovana sy fanafody manalava ny aina izay hita fa tsy manam-pahafahana ho sitrana. Tsy mba meloka amin’ny moralim-pitsaboana anefa ny tsy fampiasana indrindra raha fitaovana miompampana.

- Mety ho efa nampiasa fitaovana miompampana ny mpikarakara mba hitazomana ny aina ka manapakevitra indray tsy hampiasa ireny fitaovana ireny. Tsy diso izy ireo amin’izany fanapahan-kevitra izany.

- Azo ampiasaina ny fitaovana na fanafody hanamaivanana ny fijalian’ny marary. Mety mitondra amin’ny fahafatesana anefa ny fanafody. Tsy misy mahameloka ny fampiasana fanafody toy izany kanefa tokony hampahafantarina ny marary. Samihafa ny mikasa hanamaivana ny fijalian’ny marary amin’ny fanafohezana ny androm-piainany sy ny mikasa hanaimavana ny fijaliany kanefa izany fanamaivanana izany mety mitondra amin’ny fahafatesany.

- Meloka izay manampy ny marary hamono tena na dia mangataka hamono ny tenany aza ny marary.
Ilaina ho tsaroana mandrakariva izany foto-kevitra izany eo am-pikarakarana ireo olona an-dalam-pahafatesana na ireo mijalin’ny aretina tsy azo sitranina. Manome antsika fahefana Andriamanitra fa tsy ny fahefana rehetra. Mila fandalanjalana mandrakariva ny fanapahan-kevitra. Sady tokony ho tarihin’ny fampianaran’ny fiangonana sy ny fanilovan’ny Fanahy Masina ny konsiansin’ireo mpanapa-kevitra.

Zo Randriamaro