Cuba

Mahazo mividy finday amin’izay ny vahoaka

Iray volana taorian’ny nandraisan’i Raul Castro ny fitondrana, malalaka ny fahazoan’ny vahoaka any Cuba hampiasa ny finday.

Mazava fa hisokatra amin’ny fampiasana ny teknolojian’ny fifandraisana manamora ny fifandraisan’izao tontolo izao ny mponina any Cuba hatramin’ny nandraisan’i Raul Castro ny fitondrana tamin’ny volana fevrie teo. Nanomboka tamin’ny fahafahan’ny vahoaka mividy ordinatera sy fitaovana famakiana kapila mangirana DVD izany. Ary nitohy tamin’ny famelana azy ireo hividy malalaka ny finday izay voatokana ho an’ny sokajin’olona sasany ihany teo aloha.

Efa tany amin’ny fiandohan’ny taonjato faha-19 no isan’ny firenena niroborobon’ny teknika sy ny teknôlôjia i Cuba tany Amerika latinina. Lalamby, fifandraisana an-telefaonina, fahazoana fampitan-tsary amin’ny fahitalavitra. I Cuba koa no firenena tany amin’ny kaontinantan’i Amerika, ankoatra an’i Etazonia, nandefa olona tany an’habakaaka.

Nanana ny mahaizy azy i Cuba, araka izany. Izy rahateo no isan’ny firenena mandefa teknisianina sy mpitsabo any amin’ireo firenena mahantra indrindra eran-tany. Nikatona ihany anefa ny vahoaka ao aminy na teo aza izany lazany amin’ny teknolojia izany noho ny politikan’ny mpitondra.

Vidin-dafo

Misy sarany avo anefa ny fahafaha-misokatra amin’ny fampiasana ireny teknolojia ireny. Aloa amin’ny vola vahiny matanjaka ny fahazoa-mifandray an-telefaonina. Antso iray mianga amina finday, ohatra, mety hitovy amin’ny karaman’ny mpiasa kiobana indray andro. Manodidina ny 12 euros eo ho eo ny karaman’ny kiobana isam-bolana amin’ny ankapobeny. Na izany aza, toa tsy raharahain’ny olona loatra izay hafalosan’ny saram-pifandraisana. Ny zava-dehibe amin’izy ireo dia ny fahafahana mampiasa sy mividy finday. Fananana finday apetraka amin’ny fehikibo, fananana fitaovana famakiana kapila mangirana DVD sy ordinatera. Tian’ny kiobana aseho ny fananana izany ka aleony ny sakafo no atao ambanin-javatra toy izay tsy hanana ireo. Ny tsara indrindra dia ny hamadihana ny fifandraisana hiteraka voka-tsoa.
Tamin’ny andron’i Fidel Castro, ny vahiny sy ny mpiasa ambony amina orinasa mifandray amin’ny orinasa mampiasa renivola vahiny no mahazo misoratra hampiasa finday. Misy ihany anefa ireo mahitahita ka afaka manao izany any amin’ny varo-maizina. Rava ho azy izany amin’izao fepetra vaovao fanalalahana izao. Afaka hitondra finday eny amin’ny fehikibony izay manana fahafahana rehetra hividy izany. Tsy ny fampiasana azy loatra eto no mikaonty fa ny fahafaha-manana azy. Misy manko mampiasa azy ireny mba hamantarana fotsiny izay niantso. Eo koa ny tombontsoa kely omen’ny orinasa mpitantana ny zotram-pifandraisana. Mahazo segondra lazaina fa omena maimaimpoana ilazana hoe “antsoiko ianao” manko izy mividy finday. Ary dia mitady telefaonina fampiasan’ny vahoaka avy eo iantsoana ilay olona izay aloa amin’ny vola kiobana (pesos).

Ny azo antoka dia manana fahafahana kokoa ny mponin’i Cuba amin’ny fampiasana araka izay tiany ireny teknolojia ireny. Afaka mijery horonantsary amin’ny fitaovana famakiana kapila mangirana DVD izay tiany fa tsy izay alefan’ny fanjakana ihany. Afaka mampiasa ordinatera sy manangona izay tahirin-kevitra na vaovao tiany. Afaka mampiasa finday araka izay ilainy. Zava-dehibe ho an’ny kiobana izany eo amin’ny fahafahan’izy ireo izay zatra niaina tanatin’ny geja sy fisakanana samihafa. Eto Madagasikara koa, miroborobo fatratra ny fampiasan’ny olona ny finday sy ny karazana ordinatera matanjaka, indrindra fa matanjaka aok’izany ny dokam-barotra hanjifa. Rendrarendra sa tena ilaina ho an’ny manana azy izy ireny ? Anjaran’ny tsirairay no mamaly fa ny tsara indrindra dia ny hamadihana ny fifandraisana hiteraka voka-tsoa.

Rahary